साउन १३ । एकिकृत नेकपा माओवादीका उपाध्यक्ष डा बाबुराम भट्टराई र राष्ट्रसंघीय मिसन अनमिन प्रमुख करिन ल्याण्डग्रेन बीच आज भेटवार्ता भएको छ । उपाध्यक्ष भट्टराई निवासमा आज विहान भएको उहाँहरु दुइ बीचको भेटवार्तामा अनमिन प्रमुख ल्याण्डग्रेनले बहुमतीय प्रणालीबाट सरकार बनाउदा शान्ति प्रकृयाले पुर्णता पाउन नसक्ने भन्दै सहमतिको सरकार बन्नु पर्नेमा जोड दिनु भयो । उहाँले राष्ट्रिय सहमतिको सरकार बनाउन पहल गर्न भट्टराईलाई आग्रह गरेको भट्टराईका नीजि सचिब विश्व दिप पाण्डेले बताउनु भयो । अनमिन प्रमुख ल्याण्डग्रेनले सरकार निर्माण प्रकृयाले सेना समायोजनको काम अवरुद्ध गर्न नहुनेमा जोड दिनु भएको थियो । भट्टराईले शान्ति प्रकृयाले पूर्णता नपाउदा सम्म अनमिनको म्याद थप्नु पर्ने बताउनु भयो । माओवादी लडाकुलाई विशेष समिति मातहतमा ल्याएर समायोजन हुन चाहने र नचाहनेलाई अलग गर्न तयार रहेको पनि भट्टराईले बताएको पाण्डेले जानकारी दिनु भयो । शान्ति र सविधानको लागि राष्ट्रिय सहमतिको सरकार गठन हुनु पर्ने धारणा रहेको भट्टराईको भनाई छ ।