साउन १३ । एकिकृत नेकपा माओवादीले मधेसवादी दलहरुले नँया सरकार गठनमा समर्थन गर्नका लागि उठाएका मुद्दाहरुमा लिखित प्रतिवद्धता जनाउने भएको छ । आज बिहान पार्टी केन्द्रीय कार्यलय पेरिस डाँडामा बसेको माओवादीको बैठकले मधेसी मोर्चाले राखेका सबै मागहरुका निम्ति लिखित प्रतिबद्धता जनाउने निर्णय गरेको हो । बहुमतीय प्रणालीबाट सरकार गठन गर्नका लागि ठूलो भूमिका रहेको मधेसवादी दलहरुले आफ्नो पक्षमा समर्थन गर्नका लागि गत आइतबार भएको छलफलको आधारमा तयार पारिएको लिखित प्रतिवद्दतालाई बैठकले अन्तिम निर्णय गरेको माओावादी उपाध्यक्ष नारायणकाजि श्रेष्ठले बैठक पछि जानकारी दिनु भयो । मोर्चाको आधारपत्रको सम्बन्धमा तयार पारेको उक्त लिखित प्रतिवद्धतालाई उनीहरुसँग आज दिउस हुने छलफलमा प्रस्तुत गरिने माओवादीले जनाएको छ । २ पटक सम्म भएको प्रधानमन्त्रीको निर्वाचनमा तटस्थ बसेको मोर्चाले जुन दलले आफ्नो आधारपत्रमा लिखित प्रतिवद्धता जनाउछ उसको नेतृत्वको सरकारलाई समर्थन गर्ने बताएपछि माओवादीले उसका मागहरुलाई लिखित समर्थन गर्ने प्रतिवद्धता जनाएको हो ।