काठमाडौ माघ २५ । नेपाली कंग्रेसले सत्तारुढ दल एमालेले एकलौटी ढंगले सरकार संचालन गरेको भन्दै अशन्तुष्टी प्रकट गरेको छ । सोमबार वसेको संसदिय दलको बैठकमा बोल्ने अधिकांश सभाषद्हरुले एमालेले एकलौटी ढंगले सरकार संचालन गरेको भन्दै आवश्यक परे सरकार परिवर्तनको बिषयमा पनि गम्भिर वहस गर्नुपर्ने वताएका छन् । सभाषद्हरुले कंग्रेसले उठाएका एजेन्डाहरु सरकारले गम्भिर रुपमा नउठाए सरकार परिवर्तनका लागि पनि पछि हट्न नहुने बताएको स्रोतले जनाएको छ । बैठकमा सोमबार १ दर्जन बढि सभाषद्ले समसामयिक राजनीतिक घटनाक्रम लगायतका बिषयमा आ-आफ्नो धारणा राखेका थिए ।
यस्तै बैठकले माओबादी सेनाका लडाकुहरुको समायोजन व्यवस्थापन संबिधान जारी गर्नु पुर्वनै हुनुपर्ने निष्कर्ष निकालेको संसदिय दलका प्रबक्ता नबिन्द्र राज जोशीले जानकारी दिनुभयो । उहांले बिस्तृत शान्ति सम्झौतामै ६ महिना भित्र लडाकु समायोजन गरी सक्ने उल्लेख भएकाले माओबादीले अहिले आएर यस बिषयमा बिबाद गर्नु उचित नहुने टिप्पणी गर्नुभयो ।
यस्तै आजको बैठकले च्यानल नेपालका अध्यक्ष जमिम शाहको हत्यारालाई तत्काल पत्ता लगाई कारवाही गर्न माग गरेको छ । कंग्रेसले पछिल्लो सुरक्षा निकायका तिनै अंगका प्रमुखहरु एकैपटक बिदेश भ्रमणमा गएको प्रती पनि चासो प्रकट गर्दै सरकारको आधिकारीक धारणा माग गरेको छ । वैठकले सरकारलाई तत्काल बिजुलीको महशुल वृद्धि नगर्न आग्रह समेत गरेको बैठक पछि प्रबक्ता जोशीले पत्रकारहरुलाई जानकारी दिनुभयो ।